▪ O portavoz dos socialistas denuncia o abandono dos xardíns con follas acumuladas e “importantes fochancas” na calzada que discorre polo parque ▪ Lembra que xa no mes de abril os socialistas levaron un rogo ao pleno municipal
instando a acometer estas actuacións e, lamenta, “pasan os meses e a situación vai a peor sen que o goberno faga nada por arranxalo”
Fochancas, lousas levantadas e falta de limpeza: é a situación na que se atopa o parque Mosquera Pérez en Vista Alegre. Así o asegura desde o Grupo Municipal Socialista o seu portavoz, Gonzalo Muíños, que acusa ao goberno local de “desleixo” coas zonas verdes da cidade. Muíños lembra que xa no mes de abril os socialistas levaran a pleno un rogo instando ao goberno local a acondicionar o parque: “pasaron xa catro meses e a situación vai a peor” critica.
O edil socialista asegura que seguen a sucederse as queixas veciñais polo estado no que se atopa o parque logo de “meses de abandono que van a máis”. Reclama que se acometan actuacións de ‘rebacheo’ na rúa que atravesa o parque, mentres non se poida acometer o asfaltado da mesma, toda vez que presenta “importantes fochancas”.
“Estamos falando de actuacións do día a día, que non habería tan sequera reclamalas” explica Muíños que lle pide ao executivo de SanmarPn maior “dilixencia nas cousas do cotián”, porque “semella que entre tanto anuncio de grandes revolucións no Concello estase a esquecer das pequenas cousas, e non tan pequenas, nos barrios e nas rúas”.
Neste sentido, inclúe Muíños na lista de debes do goberno local na zona o estado no que se atopan as beirarrúas na rúa Pelamios, con un gran número de lousas soltas que “poden supor un perigo para os peóns e, sobre todo, para as persoas de maior idade e con problemas de mobilidade”.
